Kur djemtë përballen me problemin e peshës së tepërt gjatë fëmijërisë, ndodhin ndryshime fiziologjike në trup që u mohojnë mundësinë për t’u bërë baba një ditë.
Djemtë obezë, të cilët kanë problem me peshën e tepërt, shpesh më vonë në jetë bëhen burra që vështirë se mund të kenë pasardhës, zbulon një studim i ri i publikuar në European Journal of Endocrinology. Puna kërkimore ka dalë në përfundimin se djemtë me mbipeshë kanë vëllim më të vogël të testikujve, gjë që i vë në rrezik të infertilitetit në moshën madhore.
Në shumicën e rasteve, shkaku i infertilitetit mashkullor mbetet i paqartë.
Steriliteti ndikon si në shëndetin psikologjik ashtu edhe në jetën ekonomike dhe sociale të njerëzve në moshë riprodhuese. Sipas statistikave globale, infertiliteti preku 48 milionë çifte në vitin 2010. Megjithëse infertiliteti mashkullor shpesh neglizhohet, studiuesit besojnë se është një faktor kontribues në infertilitetin në çift në rreth gjysmën e të gjitha rasteve. Megjithatë, në shumicën e rasteve, arsyeja e infertilitetit mashkullor mbetet e paqartë.
Sipas një studimi gjerman, i cili vlerësoi infertilitetin në më shumë se 20,000 burra të referuar në një qendër fertiliteti, rreth 70 për qind e tyre nuk mund të diagnostikoheshin. Një përqindje e konsiderueshme e pacientëve meshkuj pa fëmijë nuk kanë asnjë shpjegim për infertilitetin e tyre. Hulumtimet tregojnë gjithashtu një tendencë të uljes së përqendrimit të spermatozoideve dhe numrit të përgjithshëm të spermatozoideve në 40 vitet e fundit.
Është vlerësuar se 60 për qind e djemve do të jenë obezë deri në moshën 35 vjeçare
Paralelisht me rënien e numrit të spermatozoideve, prevalenca e obezitetit tek fëmijët është rritur në mbarë botën nga 32 në 42 milionë. Në këtë drejtim, studiuesit vlerësojnë se rreth 60 për qind e fëmijëve sot do të jenë obezë deri në moshën 35-vjeçare.
Hulumtimet italiane zbuluan gjithashtu hipotrofi testikulare në gati një të katërtën e meshkujve 18 deri në 19 vjeç, lindshmëria e të cilëve ishte në rrezik. Kushtet e ndryshme mjedisore (përfshirë ekspozimin ndaj kimikateve që prishin sistemin endokrin) dhe zakonet personale kanë ndryshuar në mënyrë dramatike në dekadat e fundit.
Djemtë që nuk janë obezë kanë vëllim testikuj 1.5 herë më të madh.
Nuk dihet ndikimi i obezitetit dhe çrregullimeve metabolike që ndikojnë në rritjen e testikujve në fëmijëri. Këtu, studiuesit kryen një studim retrospektiv ndër-seksional mbi fëmijët dhe adoleshentët e moshës 2 deri në 18 vjeç, të analizuar nga studiues nga Njësia e Endokrinologjisë Pediatrike në Universitetin e Katanias, Siçili, për kontrollin e peshës.
Një ekip studiuesish mblodhi të dhëna për vëllimin e testikujve, moshën, indeksin e masës trupore dhe rezistencën ndaj insulinës në 268 fëmijë dhe adoleshentë. Ata zbuluan se djemtë me peshë normale kishin 1.5 herë më shumë vëllim të testikujve në krahasim me ata që ishin mbipeshë ose obezë gjatë pubertetit.
Djemtë obezë zakonisht kanë hiperinsulinemi
Djemtë dhe adoleshentët në studim me nivele normale të insulinës kishin 1.5-2 herë më shumë volum testikujsh krahasuar me ata me hiperinsulinemi, ose nivele anormalisht të larta të insulinës në trup, një gjendje që shpesh lidhet me diabetin e tipit 2, në të cilin pacientët kanë nivel shumë të lartë të insulinë në gjak. Kështu, ata me peshë të tepërt, djemtë obezë, me hiperinsulinemi ose rezistencë ndaj insulinës shfaqën një vëllim më të vogël të testikujve se bashkëmoshatarët e tyre të shëndetshëm.
Një kontroll më i kujdesshëm i peshës trupore në fëmijëri mund të përfaqësojë një strategji parandalimi
Duke pasur parasysh se vëllimi më i vogël i testikujve parashikon prodhim më të dobët të spermës në moshën madhore, studiuesit besojnë se humbja e peshës mund t’i ndihmojë pacientët të shmangin infertilitetin.
Edhe pse prevalenca e obezitetit tek fëmijët është në rritje në mbarë botën, ndikimi i obezitetit dhe çrregullimeve metabolike të lidhura me rritjen e testikujve ende nuk ë shtë e qartë – tha doktoresha Rossella Cannarella nga Universiteti i Katanias, një nga autoret e këtij punimi kërkimor.
– Në këtë studim, ne zbuluam se të qenit mbipeshë ose obez shoqërohet me vëllim më të ulët të testikujve peri-pubertal. Për më tepër, sëmundjet shoqëruese të lidhura me obezitetin, si hiperinsulinemia dhe rezistenca ndaj insulinës, janë zbuluar se ndikojnë në vëllimin e testikujve para dhe pas pubertetit. Prandaj, ne besojmë se një kontroll më i kujdesshëm i peshës trupore në fëmijëri mund të përfaqësojë një strategji parandaluese për ruajtjen e funksionit të testisit – theksoi Dr. Cannarella./natalmedia.com/
*Materialet dhe informacionet në këtë portal nuk mund të kopjohen, të shtypen, ose të përdoren në çfarëdo forme tjetër për qëllime përfitimi pa miratimin e drejtuesve të “natalmedia”
