Shkruan: Jeta Kastrati – Fizioterapeute
Artriti reumatoid është një sëmundje kronike autoimune që shkakton inflamacion të nyjeve, duke i bërë ato të ënjtura, të dhimbshme dhe të ngurta.
Simptomat përfshijnë dhimbje në nyje, ënjtje, ngurtësi (sidomos në mëngjes), lodhje, humbje peshe dhe nganjëherë temperatura të larta.
Kjo sëmundje mund të prekë çdo nyje, por zakonisht ndikon në duar, gishta dhe kyçet.
Edhe inflamacioni i lehtë është përgjegjës për shkaktimin e paaftësisë dhe dëmtimin e përhershëm. Pacientët me artrit reumatoid mund të përjetojnë një ecuri klinike të përhershme ose progresive, në varësi të simptomave të tyre.
Objektivi kryesor i menaxhimit të artritit reumatoid është të lehtësojë simptomet dhe të zvogëlojë humbjen funksionale.
Trajtimi zakonisht përfshin medikamente që kontrollojnë inflamacionin dhe ndihmojnë në menaxhimin e simptomave. Kështu, një komponent i rëndësishëm i menaxhimit të suksesshëm të sëmundjes është edukimi i pacientëve dhe informimi i tyre për modalitetet e planifikuara të trajtimit.
Objektivat e aplikimeve të fizioterapisë dhe rehabilitimit në pacientët me RA janë parandalimi i paaftësisë, rritja e kapacitetit funksional, ofrimi i lehtësimit të dhimbjes dhe edukimi i pacientit.
Para fillimit të terapisë, nevojat e pacientëve për fizioterapi përcaktohen në përputhje me paaftësinë e pacientit.
Fizioterapia është një trajtim shumë i efektshëm për pacientët që vuajnë nga artriti reumatoid.
Ajo kontribuon në lehtësimin e simptomave si dhimbja, ngurtësia dhe inflamacioni i nyjeve, duke përfshirë teknika të specializuara si ushtrimet terapeutike, masazhet dhe trajtimet me nxehtësi ose akull.
Ushtrimet e kontrolluara ndihmojnë në forcimin e muskujve që mbështesin nyjet e prekur nga artriti, duke përmirësuar stabilitetin dhe lëvizshmërinë e tyre.
Kjo zvogëlon ngurtësinë dhe përmirëson fleksibilitetin, duke mundësuar pacientëve të zhvillojnë një lëvizje më të natyrshme dhe pa dhimbje.
Pjesë e rëndësishme e fizioterapisë është dhe reduktimi i inflamacionit, që ndihmon në parandalimin e dëmtimeve të mëtejshme të nyjeve.
Për pacientët me artrit reumatoid, fizioterapia ofron mundësi për të menaxhuar më mirë simptomat dhe për të ruajtur funksionet e përditshme, duke reduktuar gjithashtu nevojën për medikamente dhe ndërhyrje kirurgjikale./natalmedia.com/
*Materialet dhe informacionet në këtë portal nuk mund të kopjohen, të shtypen, ose të përdoren në çfarëdo forme tjetër për qëllime përfitimi pa miratimin e drejtuesve të “natalmedia”
