Sipas Qendrave për Kontrollin dhe Parandalimin e Sëmundjeve (CDC), dushi mesatar zgjat tetë minuta. Përveç kësaj, nuk duhet të kaloni më shumë se 15 minuta në dush.
Dermatologu Edidiong Kaminska tregon se koha maksimale e rekomanduar e dushit është pesë deri në dhjetë minuta. Kjo është koha e mjaftueshme për të pastruar dhe hidratuar lëkurën pa e tepruar. Ajo shtoi se lëkura ka nevojë për ujë, por që nëse e teprojmë me larjen, mund të lërë pasoja negative.
Dr. Anna Guanche rekomandon që njerëzit që kanë lëkurë të thatë ose ekzemë të bëjnë një dush të ngrohtë. Shkolla e Mjekësisë Baylor thotë se dushet e nxehta duhet të shmangen gjatë muajve të dimrit sepse nxehtësia mund të dëmtojë sipërfaqen e lëkurës, e cila mund të çojë në inflamacion dhe të përkeqësojë simptomat e ekzemës.
Nëse bëni një dush të gjatë me ujë të nxehtë, mund të dehidratojë lëkurën tuaj. Kaminska shprehet se dushi shërben për të hidratuar dhe pastruar lëkurën, por një dush i gjatë me ujë të nxehtë largon vajrat natyralë nga lëkura dhe hap poret tona. Për ta mbajtur lëkurën të hidratuar, Kaminska këshillon të vendosni një krem hidratues për trupin pas dushit në lëkurë.
Nëse nuk jeni të sigurt se cila temperaturë i përshtatet më mirë lëkurës suaj, rekomandohet të bëni dush me ujë të vakët. Sipas Akademisë Amerikane të Dermatologjisë, uji i ngrohtë është më i mirë për njerëzit që kanë psoriazë dhe ekzemë.
Dushet e ftohta gjithashtu kanë përparësitë e tyre, shkruan Healthline. Për shembull, një dush i ftohtë mund të lehtësojë dhimbjet e muskujve, lëkurën e irrituar, ose mund t’ju zgjojë në mëngjes. Një dush i nxehtë mund të lehtësojë simptomat e ftohjes ose kollës.
Sipas Akademisë Amerikane të Dermatologjisë, bërja e dushit një herë në ditë është e mjaftueshme për shumicën e njerëzve. Por njerëzit që bëjnë sport ose ndonjë aktivitet tjetër që i bën të djersiten mund të bëjnë dush disa herë në ditë./natalmedia.com/
*Materialet dhe informacionet në këtë portal nuk mund të kopjohen, të shtypen, ose të përdoren në çfarëdo forme tjetër për qëllime përfitimi pa miratimin e drejtuesve të “natalmedia”
