Pyetje:
Planifikoj që të shty ciklin me pilula për shtyerje të menstruacioneve. Nuk i kam përdorur kurrë më parë, kështu që jam e interesuar ta di se si funksionojnë këto pilula, si përdoren dhe nëse kanë ndonjë pasojë dhe efekt anësor të dëmshëm. Sa shpesh mund të përdoren? A ka raste kur këto pilula nuk rekomandohen kurrsesi?
Përgjigje:
Përshëndetje!
E nderuar,
Tabletat për shtyerjen e menstruacioneve përmbajnë një formë sintetike të hormonit seksual progesteronit. Teprica e këtij hormoni shtyn fillimin e një cikli të ri menstrual. Tabletat merren zakonisht 3 ditë para menstruacioneve të pritshme, dy herë në ditë. Ato përdoren për aq ditë sa dëshironi të vononi menstruacionet, por jo më shumë se 14 ditë rresht. Menstruacioni zakonisht ndodh disa ditë pas ndalimit të pilulës.
Duhet të theksohet se efikasiteti i tyre do të ulet nëse pilula anashkalohet. Shtyerja e menstruacioneve në këtë mënyrë nuk duhet të jetë një praktikë e rregullt për shkak të çrregullimeve hormonale që mund të ndodhin nëse pilulat merren shpesh. Nëse këto pilula merren në mënyrën e përshkruar dhe të përshtatshme, efektet anësore që mund të shfaqen zakonisht janë të lehta, në formën e menstruacioneve më të bollshme, dhimbje koke ose fryerje të gjoksit. Kujdes i veçantë kërkohet për gratë mbi 35 vjeç, duhanpirëset, personat me hipertension arterial dhe trombozë venoze.
Është e rëndësishme të mbani mend se këto pilula nuk kanë efekt kontraceptiv dhe nuk ofrojnë mbrojtje kundër shtatzënisë së padëshiruar.
Dr Samire Ademi Lutolli – Gjinekologe dhe Obstetre
𝐃𝐫 𝐒𝐚𝐦𝐢𝐫𝐞 𝐀𝐝𝐞𝐦𝐢 𝐋𝐮𝐭𝐨𝐥𝐥𝐢, 𝐬𝐩𝐞𝐜𝐢𝐚𝐥𝐢𝐬𝐭𝐞 𝐞 𝐠𝐣𝐢𝐧𝐞𝐤𝐨𝐥𝐨𝐠𝐣𝐢𝐬𝐞̈ 𝐝𝐡𝐞 𝐨𝐛𝐬𝐭𝐞𝐭𝐫𝐢𝐤𝐞̈𝐬
/natalmedia/
*Materialet dhe informacionet në këtë portal nuk mund të kompjohen, të shtypen, ose të përdoren në çfarëdo forne tjetër për qëllime përfitimi pa miratimin e drejtuesve të “natalmedia”
