Dy bebe në barkun e nënës. Njëra pyeti tjetrën: “A besoni në jetën pas lindjes?”
Tjetra u përgjigj:
“Sigurisht. Duhet të ketë diçka pas lindjes. Ndoshta ne jemi këtu për t’u përgatitur për atë që vjen më pas”.
“Pa kuptim,” tha e para. “Nuk ka jetë pas lindjes së fëmijës, çfarë lloj jete do të ishte ajo?”
Tjetra tha: “Nuk e di, por do të ketë më shumë dritë se këtu. Ndoshta do të mund të ecim në këmbë dhe të hamë me gojën tonë. Do të kemi ndoshta shqisa të tjera që nuk mund t’i kuptojmë tani”.
E para u përgjigj:
“Kjo është çmenduri. Ecja është e pamundur. Dhe të hamë me gojë!? Qesharake! Kordoni i kërthizës na siguron ushqimin dhe gjithçka që na nevojitet. Jeta pas lindjes është e paimagjinueshme”.
Bebeja tjetër këmbënguli, “Epo, unë mendoj se ka diçka dhe ndoshta ndryshe nga ajo që është këtu. Ndoshta njerëzit nuk kanë më nevojë për këtë tub fizik”.
E para: “E pakuptimtë, nëse vërtetë ka jetë pas lindjes, askush nuk është kthyer prej andej, lindja e fëmijëve është fundi i jetës dhe pas lindjes nuk ka asgjë tjetër përveç errësirës, heshtjes dhe harresës. Nuk do të vemi askund”.
“Epo, nuk e di,” tha tjetra “por jam e sigurtë se do ta gjejmë mamanë dhe ajo do të kujdeset për ne.”
E para u përgjigj: ‘Mami, a beson vërtet në mami?’, Kjo është qesharake. Nëse ka nënë, atëherë ku është ajo tani?”
Tjetra i tha:
“Ajo është rreth nesh. Ne jemi të rrethuar prej saj. Ne jemi në të. Ne jetojmë me të. Pa të, kjo botë nuk mund të ekzistonte”.
E para tha:
“Epo, nuk e shoh mamin, kështu që është logjike që ajo të mos ekzistojë”.
Tjetra i përgjigjet:
“Jo, nuk jam dakord. Sepse ndonjëherë, kur gjithçka përreth është qetë, ne mund ta dëgjojmë atë të këndojë dhe ta ndjejmë atë duke përkëdhelur botën tonë. Besoj se jeta jonë reale do të fillojë pas lindjes”./natalmedia.com/
Përktheu dhe përshtati
Dr Samire Ademi Lutolli
*Materialet dhe informacionet në këtë portal nuk mund të kopjohen, të shtypen, ose të përdoren në çfarëdo forme tjetër për qëllime përfitimi pa miratimin e drejtuesve të “natalmedia”
